HStAOrient5a: 38v

degül lā‑mekānīyedür işāret‑i ḥissīyeʾi qabūl ėtmez bedende munṭabiʿ ve dāḫil // degüldür. Taʿalluq‑i tedbīriyle müteʿalliqdür. Ve bu qavl mütekellimīnden İmām Ġazālī // ḥażretlerinüñ maqbūlidür ve ṣūfīye‑i mükāşifīnüñ meşhūdıdur. Şerḥ‑i // Mevāqıfda mesṭūrdur. Ammā tecerrüd‑i nefse qābil olmaq nefy‑i tecerrüdātı // münāfīdür Baʿdehū maʿlūm ola ki nefs‑i nāṭıqadan quvvet‑i ʿāqile münbaʿis̱ // olur ve ol quvvet içün merātib‑i erbaʿa vardur. Mertebe‑i ūlā: quvvet‑i // ʿāqilenüñ mebdeʾ‑i fıṭratda ṣuver‑i maʿqūlātdan bi‑l‑küllīye ḫālī olduġı // mertebede ṣuver‑i mezbūreye istiʿdādı olduġı ḥālde. Ve // bu mertebeye ʿaql‑i heyūlānī dėrler. Ṣūretden ḫālī olan heyūlāya teşbīh // olınur mes̱elā ṣıbyānuñ ʿaqlı gibi. Baʿdehū istiʿmāl‑i ālāta qādir // olub ḥavāss‑i ẓāhiresin ve ḥavāss‑i bāṭınasın taṣarruf ėtdükden // ṣoñra anuñ‑çün ʿulūm‑i evvelīye ḥāṣıl olub ve naẓarīyātuñ kesbine // istiʿdād‑i kāmil olur ol mertebeye ʿaql bi‑l meleke dėrler. Baʿdehū quvvet‑i // ʿāqilede maʿqūlāt‑i naẓarīye tekerrür‑i kesb ile maḫzūn olub qaçan // isterse kesb‑i cedīd istiḥżārına qādir olur ol mertebesine // ʿaql bi‑l‑fiʿl dėrler baʿdehū quvvet‑i ʿāqilede maʿqūlāt‑i naẓarīye maḫzūn // olduqdan ṣoñra muttaṣıl müşāhidi ve müstaḥżırı olur. Aṣlen // ẓuhūr ẕuhūl ėtmez ve müşāhedesinden zāʾil olmaz. Ol mertebeye // ʿaql‑i müstefād dėrler zīrā ol mertebe ʿaql‑i faʿʿāldan müstefād olur.